قالو لماذا انت صامت

قالوا علامك صامت وقلت ياناس = كثر الكلام يقل لاجله مقامي


الصمت حكمه والحكي مصدر إفلاس = ولقيت في صمتي يزيد احترامي


الصمت له معنى وله ذوق وإحساس = مركب نجاتك في بحور الظلامي


ترى الرجل صوره من الراس للساس = ثم يتبين جوهره بالكلامي


إما نطق في كلمة ترفع الرأس = تضفي على شكله جديد الاسامي


وإلا يعود معدنه معدن نحاس = يرميه سهمه بعد ماكان رامي


لا صار عندك من ثمينات الألماس = خله بصدرك لين وقت التمامي


أخاف يطلعلك من الناس بلاس = وإلا سفيه ما يرد السلامي


الله خلق خلقه على عدة أجناس = وكلن يسوقه مذهبه للأمامي


والله خلق بالطير قمري وقرناس = ووقت الهدد ما ينغزي بالحمامي


لا جال في صدرك من الهم هوجاس = وعينك يحاربها لذيذ المنامي


ونفسك عليله والفكر صار محتاس = اترك طمان القاع وارق السنامي


عليك بالعالي ليا هب نسناس = يبري الجروح الخافيه والعظامي


وخلك لربعك دايم الدوم نبراس = وخص القريب وخص ولد العمامي


خلك لهم في داجي الليل مقباس = ولصاحب أصدق من حقوق الغمامي


ربعك ذراك ليا لحق راسك الباس = قدو لهم شربك ولو كنت ضامي


وخلك لثوب الطيب والعز لباس = واترك دروبٍ تنتهي بالحرامي


وفعل الجميل وواجب الضيف نوماس = ومن لا نفع بالضيق نفعه عدامي


بيت الكريم أبوابه بدون حراس = وبيت البخيل يعد مثل الهدامي


كلٍ بها الدنيا نصيبه بمقياس = ياخذ نصيبه لو جفوه الأنامي

omar elmsry